Skip to content

လွတ်လပ် တရားမျှတမှုမရှိမဲ့ ၂၀၁၀ ရွေးကောက်ပွဲ

May 17, 2010
tags:

၂၀၁၀ ရွေးကောက်ပွဲဟာ တရားမျှတ လွတ်လပ်မှုရှိမှာမဟုတ်ပါ

၂၀၁၀ ရွေးကောက်ပွဲဟာ စစ်အာဏာရှင်စံနစ် သက်ဆိုးရှည်စေမဲ့ “ကောက်ရွေးပွဲ”သာ ဖြစ်မှာမို့  လွတ်လပ်ပြီး တရားမျှတမဲ့ ရွေးကောက်ပွဲ ဖြစ်လာမှာမဟုတ်ပါ။

၂၀၁၀ ရွေးကောက်ပွဲဟာ စစ်အစိုးရကိုတရားဝင်ဖြစ်စေမဲ့ နအဖ တဘက်သတ်ရေးဆွဲထားပြီး မသမာတဲ့ နည်းပေါင်းစုံဖြင့် ပြည်လုံးကျွတ်ဆန္ဒ ခံယူထားတဲ့ ၂၀၀၈ အခြေခံဥပဒေကို အသက်သွင်းမှာ  ဖြစ်ပါတယ်။

မတ်လ(၈)ရက်မှာ နအဖ ဥက္ကဌက ထုတ်ပြန်လိုက်တဲ့ “နိုင်ငံရေးပါတီများ မှတ်ပုံတင်ခြင်း ဥပဒေ” နဲ့ ရွေး ကောက်ပွဲကော်မရှင် ဥက္ကဌက မတ်လ(၁၇)နေ့မှာကြေညာတဲ့”နိုင်ငံရေးပါတီများ မှတ်ပုံတင်ခြင်း နည်းဥပဒေ”တို့ ရဲ့ အခန်း(၅)အထွေထွေကဏ္ဍမှာ-ကော်မရှင်က နိုင်ငံရေးပါတီတွေအပေါ် လွှမ်းမိုးနိုင်ပုံကို ဖော်ပြထားပါတယ်။ နိုင်ငံရေးပါတီတခုဟာ ပါတီအခြေခံဥပဒေနဲ့အညီ ပါတီစည်းမျဉ်း(သို့မဟုတ်)နိုင်ငံရေးသဘောတရားကို ပြင်ဆင် တယ်ဆိုရင် ကော်မရှင်ရဲ့  ခွင့်ပြုချက်ရမှသာ အတည်ဖြစ်တယ်၊ နိုင်ငံရေးပါတီခေါင်းဆောင်ပိုင်းကို ကော်မရှင်က အချိန်မရွေးခေါ်ယူပြီး ညွှန်ကြားနိုင်တယ်လို့ ဆိုထားတဲ့အတွက် ကော်မရှင်ဟာ နိုင်ငံရေးပါတီ အားလုံးကို စီမံအုပ်ချုပ်တဲ့ ကြီးကြပ်ရေးအဖွဲ့ ဖြစ်နေပါတယ်။ ကော်မရှင်ရဲ့ ရွေးကောက်ပွဲမှာ သမာသမတ်ကျရေး အပေါ် သံသယတွေကြီးထွားနိုင်စရာ များလှပါတယ်။

ကော်မရှင်ရဲ့  ဆုံးဖြတ်ချက်ဟာ အပြီးအပိုင်ဖြစ်စေရမယ်၊ ကော်မရှင်ကို တရားစွဲဆိုပိုင်ခွင့်မရှိ၊ ကော်မရှင်ဟာ ပါတီတွေကို ညွှန်ကြားနိုင်တယ်၊ ကြီးကြပ်နိုင်တယ်၊ (၃) နှစ်အထိ ယာယီရပ်ထားနိုင်ပြီး နောက်ဆုံးမှာ ပါတီ မှတ်ပုံတင်ကို ပယ်ဖျက်ပြီး ပါတီကိုပါ ဖျက်သိမ်းနိုင်ခွင့်ရှိတယ်လို့ နအဖ ဥက္ကဌက အမိန့်ထုတ်ထားပါတယ်။ နအဖ ဥက္ကဌ နဲ့ ကော်မရှင်ဟာ ဥပဒေအထက်မှာရှိနေတဲ့ သဘောပါ။ ဒါကြောင့် ယင်းဥပဒေများမှာ မှန်ကန် တရားမျှတမှု မရှိနိုင်ပါ။

နိုင်ငံတိုင်းလိုလိုမှာ တရားဝင်နိုင်ငံရေးပါတီအနေနဲ့ ရွေးကောက်ပွဲမဝင်လိုက မ၀င်ပဲနေလို့ရကြပါတယ်။ ၂၀၁၀ ရွေးကောက်ပွဲဥပဒေကတော့ အနည်းဆုံး မဲဆန္ဒနယ်မြေ (၃)နယ်မှာ မယှဉ်ပြိုင်ရင် နိုင်ငံရေးပါတီအဖြစ် ဆက်လက်ရပ်တည်ခွင့် မရှိဘူးလို့ ဆိုပါတယ်။ ပါတီမှတ်ပုံတင်လိုက်တာနဲ့ မတရားတဲ့ ၂၀၀၈ အခြေခံဥပဒေ ကိုလဲ အလိုအလျောက်ယုံကြည်လက်ခံပြီးသားဖြစ်တာလို့ ရွေးကောက်ပွဲဥပဒေက ဆိုထားပါတယ်။ မိမိဆန္ဒမပါ တာကို အဓမ္မစေခိုင်းနေတာပါ။

ဘယ်လိုပဲသုံးသပ်သုံးသပ် ရွေးကောက်ပွဲဥပဒေမှာ ဖော်ပြထားတဲ့ဥပဒေများဟာ မတရားတဲ့ဥပဒေတွေသာဖြစ်ပါတယ်။

သာမန်အကြပ်၊ တပ်သားတွေ စစ်တပ်ကနှုတ်ထွက်ခွင့်ရရေးအတွက် နှစ် ချီစောင့်ရပါတယ်။ လာမဲ့ရွေးကောက် ပွဲမှာဝင်ဘို့ ရာထူးကြီးတွေယူထားတဲ့ စစ်ဗိုလ်ကြီးများနှုတ်ထွက်တာကျတော့ ရက်ပိုင်းအတွင်း ‘အပ်ချလောင်း’နဲ့ အစုလိုက်အပြုံလိုက်  အလွယ်တကူထွက်လို့ ရသွားပါတယ်။ မလိုတမျိုး လိုတမျိုး စစ်အာဏာရှင်စံနစ်ရဲ့ အစီ အမံဖြစ်ပါတယ်။ လာမဲ့`ကောက်ရွေးပွဲ’မှာ စစ်ဘက်အုပ်စုကြီးစိုးရေးအတွက်ပါ။ ၂၀၁၀ ရွေးကောက်ပွဲဟာ သမာ သမတ်ကျကျ တရားမျှတပြီးလွတ်လပ်မှု ရှိမှာမဟုတ်ပါ။

ကြံ့/ဖွံ့ပါတီအဖြစ်တည်ထောင်ရာမှာလဲ ရှင်းရှင်းလင်းလင်းမရှိပါ။ ပါတီရဲ့ အမည်၊ အလံ၊ ဆောင်ပုဒ်၊ ဝတ်စုံ စတာ တွေဟာ လူမှုရေးအဖွဲ့ဖြစ်တဲ့ ကြံ့/ဖွံ့အသင်းအတိုင်း ထပ်တူဖြစ်နေလျက်ပါ။ ကြံ့/ဖွံ့အသင်းရဲ့ ပြည်သူ့ဘဏ္ဍာ ပစ္စည်းများကိုလဲ မလိမ့်တပတ်လုပ် မောင်ပိုင်စီးပြီး ကြံ့/ဖွံ့ပါတီအသွင် လုပ်ဆောင်သွားမဲ့ သဘောက ပေါ်လွင် လျက်ပါ။ အသင်းနဲ့ပါတီ သီးခြားဖြစ်ကြောင်း အတိအလင်းကြေညာတာလဲမရှိပဲ ချော်လဲရောထိုင်နေဆဲပါ။ ရိုးသားပီပြင် အမြင်ကြည်လင်မှုမရှိပါ။

တရားဝင်အစိုးရများတောင်မှ ရွေးကောက်ပွဲမဝင်မဲ့ သမာဓိလူကြီးများပါဝင်တဲ့ ကြားဖြတ်အစိုးရထံ အုပ်ချုပ်ရေး အာဏာအပ်ပြီး ရာထူးများမှထွက်ကာ နိုင်ငံရေးဝန်ထမ်းများဘဝ ခဝါချလျက် ဥပဒေနဲ့အညီ ရွေးကောက်ပွဲဝင်ဘို့ ပြင်ဆင်ကြလေ့ရှိပါတယ်။ ရွေးကောက်ပွဲမှာ လက်ရှိအာဏာအရှိန်အဝါလွှမ်းမိုးမှုကင်းအောင် ဆောင်ရွက်ကြရ တာပါ။ တရားမဝင်တဲ့အာဏာသိမ်း စစ်အစိုးရအရာရှိကြီးများကတော့ ‘နောင်လဲငါတို့ပဲ-အခုလဲငါတို့ပဲ’ ဆိုပြီး ဥပ ဒေအပြင်ကလူများအဖြစ် ပြုမူနေကြတာပါ။

နအဖရဲ့ရွေးကောက်ပွဲဥပဒေနဲ့ ကော်မရှင်ဥပဒေများကို မျက်ကွယ်ပြုကာ ဥပဒေကင်းလွတ်ခွင့်ရမဲ့ စစ်ဘက် လွှတ်တော် အမတ် ၂၅% ကို စစ်ဦးစီးချုပ်ကခန့်ထားမှာပါ။ `ကောက်ရွေးပွဲ’ကတက်လာမဲ့ စစ်ဗိုလ်လူထွက် အမတ်ပေါင်းများစွာနဲ့ပူးပေါင်းကာ ဥပဒေအထက်မှာ မိန့်မိန့်ကြီးရှိနေမဲ့ စစ်ဦးစီးချုပ်ရဲ့အောက်ကနေ ပြည်သူ့အာ ဏာကိုအလွဲသုံးနိုင်ဘို့ ကြိုတင်ကြံစည်တာသာဖြစ်တဲ့အတွက် ၂၀၁၀ ရွေးကောက်ပွဲဟာ သမာသမတ်ကျ မျှတ လွတ်လပ်မှု ရှိမှာမဟုတ်ပါ။

သမာသမတ်ကျ မျှတ လွတ်လပ်မှုရှိတဲ့ရွေးကောက်ပွဲဖြစ်လာဘို့ ဆောင်ရွက်နိုင်တဲ့နည်းလမ်းရှိပါတယ်။

          ၂၀၁၀ ရွေးကောက်ပွဲကိုရွှေ့ဆိုင်းလိုက်ပါ။

          သမာဓိလူကြီးများဖြင့် ကြားဖြတ်အစိုးရ ဖွဲ့စည်းပေးပါ။

          တရားတဲ့ရွေးကောက်ပွဲဥပဒေများ ပြဌာန်းပေးပါ။

          သမာသမတ်ကျတဲ့ရွေးကောက်ပွဲကော်မရှင်ဖွဲ့ပေးပါ။

          မှန်ကန်တဲ့ကော်မရှင်ဥပဒေများထုတ်ပြန်ပေးပါ။

          အများလက်ခံနိုင်မဲ့အခြေခံဥပဒေဖြစ်အောင် ၂၀၀၈ အခြေခံဥပဒေကိုပြင်ဆင်ပေးပါ။

လွတ်လပ်မျှတပြီး လိမ်လည်လှည့်ဖြားခြင်းကင်းတဲ့ လုပ်ထုံးလုပ်နည်းများနဲ့ အများပါဝင်နိုင်တဲ့ ရွေးကောက်ပွဲကျင်းပပေးပါ။

ဒီလိုသာဆောင်ရွက်ပေးမယ်ဆိုရင် အပြည်ပြည်ဆိုင်ရာ စောင့်ကြည့်အကဲဖြတ်အဖွဲ့များမလိုတော့ပါ။ စစ်မှန်တဲ့ ပြည်သူ့အစိုးရလဲ ပေါ်ပေါက်လာမှာပါ။ နတ်လူသာဓုခေါ်ကြမှာပါ။

ပြည်သူအများစုကောင်းစားပြီး လူတစုမကောင်းစားမဲ့အလုပ်ကိုမလုပ်တဲ့၊ လူတစုကောင်းစားပြီး ပြည်သူအများစု မကောင်းစားမဲ့အလုပ်သာ လုပ်လေ့ရှိတဲ့ အာဏာရှင်တွေကတော့ ဆောင်ရွက်ပေးဘို့နေနေသာသာ အိပ်မက် တောင် မက်မှာမဟုတ်ဘူးလို့ထင်မြင်မိပါတယ်။

နှင်းယုလွင် –  တိုကျို၊ ဂျပန် – ၂၀၁၀ မေ ၁၈

 

၂၀၁၀ ရွေးကောက်ပွဲမှ ထွက်ပေါ်လာမဲ့ လွှတ်တော်နဲ့အာဏာပိုင်များဟာ ပြည်သူ့ဆန္ဒကို ထင်ဟပ်မှာမဟုတ်ပါ 

ဗိုလ်ချုပ်အောင်းဆန်းတည်ထောင်ခဲ့တဲ့တပ်မတော်လို ‘ပြည်သူသာအမိ ပြည်သူသာအဘ’ လို့ ခံယူချက်မျိုး မဟုတ်ပဲ လက်ရှိအာဏာရှင်ရဲ့ခါးပိုက်ဆောင်စစ်တပ်ဟာ ‘တပ်မတော်သာအမိ တပ်မတော်သာအဘ’ အဖြစ် စစ်တပ်မိသားစုအတွက်သာရပ်တည်နေတာပါ။ ပြည်သူအများစုအတွက်မဟုတ်ပါ

ကြံ့ဖွံ့အဖွဲ့ရဲ့ခေါင်းဆောင်ပိုင်းမှအစ အဖွဲ့ဝင်များဟာ စစ်အာဏာရှင်စံနစ် သက်ဆိုးရှည်ရေးအတွက် ဒီမိုကရေ စီရေးလှုပ်ရှားသူများအပေါ် နည်းမျိုးစုံဖြင့် ဖိနှိပ်ချုပ်ခြယ်ခြောက်လှန့်လျက်ရှိနေဆဲဖြစ်ပါတယ်။

လက်ရှိစစ်ဗိုလ်ချုပ်များဟာ လာမည့်ရွေးကောက်ပွဲတွင် ဝင်ရောက်ယှဉ်ပြိုင်ရန် စစ်တပ်မှထွက်လိုက်သော်လဲ စစ်အစိုးရ၏ရာထူးများမှ မနှုတ်ထွက်သေးပါ။ လူမှုရေးအသင်းအဖြစ်ဖွဲ့စည်းထားတဲ့ ကြံ့ခိုင်ဖွံ့ဖြိုးရေးအသင်း ကို နိုင်ငံရေးပါတီအဖြစ်အသွင်ပြောင်းပြီး ယင်းဗိုလ်ချုပ်များကရွေးကောက်ပွဲဝင်ကြမှာဖြစ်ပါတယ်။ ထိုအသင်း ရဲ့နာယကမှာ နအဖဥက္ကဌသာဖြစ်ပါတယ်။ ယခုအသွင်ပြောင်းလိုက်တဲ့ ကြံ့ခိုင်ဖွံ့ဖြိုးရေးပါတီတွင်ကော နာယကမှာ မည်သည့်အနေအထားတွင်ပါဝင်နေမလဲနှင့် မပါဝင်သော်လဲ မည်သို့ပတ်သက်မှုရှိနေမလဲကို ဆန်း စစ်ရမှာဖြစ်ပါသည်။ သေချာတာကတော့ နာယကဗိုလ်ချုပ်မှူးကြီး၏အလိုဆန္ဒကို မဆန့်ကျင်ရဲပဲ လိုက်နာ ဆောင်ရွက်ကြရမှာပဲဖြစ်ပါတယ်။ သူရဲ့လောင်းရိပ်အာက်ကလွတ်နိုင်ကြမည်မဟုတ်ပါ။

စစ်တပ်တခုဟာ စစ်ဘက်ဆိုင်ရာကိစ္စများအတွက် တသွေးတသံတမိန့်စံနစ်ကိုကျင့်သုံးခြင်းဟာ စစ်ရေး သဘာဝအလျောက် လိုအပ်ပါတယ်။ သို့သော်လဲ ပြည်သူ့အုပ်ချုပ်ရေးတွင် အများပြည်သူများအပေါ် တသွေး တသံတမိန့်ကိုကျင့်သုံးခြင်းသည် မမှန်ကန်ပါ။ ယင်းသို့ကျင့်သုံးလျှင် ဒီမိုကရေစီစံနစ်နှင့် ဆန့်ကျင်နေမည်ဖြစ် ပါတယ်။ ထို့ကြောင့် လာမည့်ရွေးကောက်ပွဲဟာ လွတ်လပ်မှုမရှိနိုင်သလို တရားမျှတမှုလည်းမရှိနိုင်ပါ။

ပြည်ထောင်စု ကြံ့ခိုင်းရေးနဲ့ ဖွံ့ဖြိုးရေးအသင်းကို နအဖက ၁၉၉၃ ခု စက်တင်ဘာလ ၁၅ ရက်နေ့တွင် စတင် တည်ထောင်ခဲ့ပြီး နအဖဥက္ကဌ ဦးစီးတဲ့ နအဖအဖွဲ့ဝင်များနှင့်ဝန်ကြီးများက နာယကအဖွဲ့ဝင်များနှင့် ဗဟို ကော်မီတီဝင်များအဖြစ် ပါဝင်ထားတာပါ။ နအဖပိုင်အသင်းကို ပါတီအဖြစ် ပြန်ဖွဲ့လိုက်တော့လဲ နအဖရဲ့ပါတီ ပဲဖြစ်လာတာပါပဲ။ ဝတ်စုံသာပြောင်းပြီး လူမပြောင်း မူမပြောင်းလမ်းစဉ်ပါပဲ။ အင်အားကလဲ ၂၂  သန်းလောက်ရှိ တယ်ဆိုပါတယ်။

တဘက်သတ်အတည်ပြုထားတဲ့ ၂၀၀၈ အခြေခံဥပဒေနှင့် မတရားတဲ့ရွေးကောက်ပွဲဆိုင်ရာဥပဒေများဟာ လူထုဆန္ဒစစ်စစ်ကို ပေါ်လွင်ထင်ဟပ်ခြင်းမရှိကြောင်း ကမ္ဘာနှင့်အဝှမ်းထောက်ပြပြောဆိုနေသော်လဲ နအဖဟာ သူတို့ဘာသာသတ်မှတ်ထားတဲ့ လမ်းကြောင်းကို တရွေးသားမှပြောင်းလဲမည်မဟုတ်ပါ။ သူတို့ဖြစ်စေချင်တဲ့ ရည်ရွယ်ချက်အတိုင်း အချိန်ကိုက်ကာ အချိန်လိုက်လုပ်ဆောင်နေတာပါ။

ပေါ်ပေါက်လာမည့် လွှတ်တော်နှင့် အာဏာပိုင်အဖွဲ့အစည်းများဟာ လူထုအများစုအကျိုးကောင်းစားရေးထက်  နအဖနှင့်အလိုတော်ရိများပါဝင်တဲ့ လူနည်းစုအကျိုးကောင်းစားရေးကိုသာ သေချာလုပ်ကိုင်သွားမှာ ဖြစ်ပါတယ်။ ကြံ့ဖွံ့ပါတီရဲ့ လူဝတ်လဲ စစ်ဘက်အကြီးအကဲများနှင့် မဖြစ်မနေပါဝင်မည့် စစ်တပ်ခန့် ၂၅%သော အမတ်များ သာ လာမည့်လွှတ်တော်မှာ ကြီးစိုးလွှမ်းမိုးနေမှာဖြစ်ပါတယ်။ ကျန်လူနည်းစုထဲတွင်လဲ သူတို့စိတ်ကြိုက် “ဗေါင်းတော်ငြှိမ့် စိတ်တော်သိ အလိုတော်ရိ” များစွာ ပါနေမှာဖြစ်ပါတယ်။ စစ်အာဏာရှင်မူဝါဒ မပြောင်းပဲ ယူနီဖောင်းပြောင်းရုံမျှဖြင့် ယင်းတို့ပါဝင်ဖြစ်ပေါ်လာမည့် လွှတ်တော်တို့  အာဏာပိုင်အဖွဲ့အစည်းတို့ဟာ လူထုဆန္ဒကိုအမှန်တကယ် ကိုယ်စားပြုမည့် အဖွဲ့အစည်းများ လုံးဝမဖြစ်နိုင်ပါ။

နှင်းယုလွင် –  တိုကျို၊ ဂျပန် – ၂၀၁၀ ဧပြီ ၃၀

 

၂၀၁၀ ရွေးကောက်ပွဲတွင် မပါဝင်သင့်ပါ

၂၀၁၀ အတွင်းကျင်းပမဲ့ နအဖရဲ့ ရွေးကောက်ပွဲတွင် မည်သည့်ရည်ရွယ်ချက်ဖြင့်ဖြစ်စေ  တိုင်းရင်းသားပါတီများ အနေနှင့် ဝင်ရောက်ပါဝင်ခြင်းမပြုသင့်ကြောင်းတင်ပြလိုပါသည်။

၁။       ။ နအဖ၏ အမျိုးသားညီလာခံသည် အတုအယောင်ညီလာခံသာဖြစ်ခြင်း

၂။       ။ နအဖမှတဘက်သတ်ရေးဆွဲထားသော ၂၀၀၈ ဖွဲ့စည်းအုပ်ချုပ်ပုံအခြေခံဥပဒေသည် တိုင်းရင်းသား အများပြည်သူများအတွက် အကျိုးပြုမည့်ဥပဒေများမဟုတ်ပဲ၊ စစ်အာဏာရှင်စနစ်သက် ဆိုးရှည်ရန်သာဖြစ်ခြင်း

၃။       ။ ၂၀၀၈ ဖွဲ့စည်းအုပ်ချုပ်ပုံအခြေခံဥပဒေကို အတည်ပြုရန် ပြည်လုံးကျွတ်ဆန္ဒခံယူပွဲတွင် မသမာမှုနည်း ပေါင်းစုံဖြင့် ထောက်ခံမဲများအဓမ္မကောက်ယူခဲ့ခြင်း

၎။       ။ ၂၀၁၀ ရွေးကောက်ပွဲဆိုင်ရာဥပဒေများသည် မတရားထုတ်ပြန်သည့် သမာသမတ်မကျသော ဥပဒေ များဖြစ်ခြင်း

၅။       ။ နိုင်ငံတွင် ပြည်ထောင်စုတပ်မတော်တခုတည်းရှိရမည်ဆိုသည့်မူဖြင့် နအဖက အပစ်ရပ်  ငြိမ်းအဖွဲ့ များကို ပထမအနေနှင့် နယ်စပ်စောင့်တပ်ဖွဲ့များကို လက်ရှိ နအဖစစ်တပ်အောက်တွင်ထားရှိပြီး နောင်သော် အပစ်ရပ်ငြိမ်းအဖွဲ့များကို လက်နက်ဖြုတ်မည့်စီမံကိန်းကို ဖော်ဆောင်မှာဖြစ်ခြင်း

၆။       အနာဂတ်တွင် မည်သည့်တိုင်းရင်းသားလူမျိုးစုများတွင် ကိုယ်ပိုင်လက်နက်ကိုင်တပ်ဖွဲ့များ ရှိမည် မဟုတ်ခြင်း

ရ။       အကယ်၍ အများလက်ခံနိုင်ဘွယ်မရှိသော ၂၀၁၀ ရွေးကောက်ပွဲတွင် တိုင်းရင်းသားပါတီများ အနေနှင့် ဝင်ရောက်ယှဉ်ပြိုင်အရွေးခံရသော်လည်း ၂၅%သောစစ်တပ်လွှတ်တော်အမတ်များ၏ ကြိုးကိုင်ခြယ်လှယ်မှု အောက်တွင်သာ လှုပ်ရှားရမည်သာဖြစ်ခြင်း

          တို့ကြောင့် ၂၀၁၀ ရွေးကောက်ပွဲမှပေါ်ထွက်လာမည့် လွှတ်တော်နှင့်အစိုးရသည် စစ်မှန်သော ဒီမိုကရေစီစံနစ်ကို လုံးဝမကျင့်သုံးပဲ ဒီမိုကရေစီမျက်နှာဖုံးစွပ် စစ်အာဏာရှင်စနစ်ကိုသာ ဆက်လက် ကျင့်သုံး မှာဖြစ်ကြောင်းထင်ရှားပါသဖြင့် မြန်မာနိုင်ငံတိုင်းရင်းသားအများစုမှာ စစ်ကျွန်အဖြစ်နှင့်သာ နွံနစ်နေကြရမှာဖြစ် ပါသည်။

တိုင်းရင်းသားပါတီများအနေနှင့် ဝင်ရောက်ပါဝင်ခြင်းမပြုသင့်ကြောင်းတင်ပြလိုပါသည်။ 

နှင်းယုလွင် –  တိုကျို၊ ဂျပန် – ၂၀၁၀ ဧပြီ ၁၇

No comments yet

Leave a Reply

Fill in your details below or click an icon to log in:

WordPress.com Logo

You are commenting using your WordPress.com account. Log Out / Change )

Twitter picture

You are commenting using your Twitter account. Log Out / Change )

Facebook photo

You are commenting using your Facebook account. Log Out / Change )

Google+ photo

You are commenting using your Google+ account. Log Out / Change )

Connecting to %s

%d bloggers like this: